Bal cimeşem

Tormış yäme, yäşäw täme
Balalarda ikän bit.
Bäxet-şatlığıbız bulıp
Balam, tizräk üsep cit.

Quşımta:
Can cılıñnı toyıp yäşim,
Sizäm yöräk tibeşeñ.
Söyü-säğdät baqçasınnan
Xoday birgän cimeşem.

Quanıç häm şatlığıbız
Barıbız öçen dä sin.
Üzeñ şayan, üzeñ ütker,
Ziräk bulıp üsäseñ.

Baldan tatlı balam, diep,
Äbi-babay quana.
Menä şulay qäderle ul
Balañnan tuğan bala.

Bäxet-täwfıyq citäkläşep,
Yanıñda ğına yörsen.
Saw-sälamät bulıp üs sin,
Xodayım, ğömer birsen.

Yaqın duslarsız qalmıyq

Tormışnıñ älegä başı,
Mäxäbbäte mäñgelek.
Matur cırlar belän bizik
Büläk itik izgelek.

Quşımta:
Yalğız ütmäsen ğömerlär,
Zur eşlär belän qaynıyq.
İlne, cirne, yar yaratıyq,
Yaqın duslarsız qalmıyq!

Yäşlekne bergä qarşılap,
Bergä ozatır öçen,
Yışraq küreşik, duslarım,
Ükeneç qalmas öçen...

Aralar yıraq bulsa da,
Sez duslarnı sağınam.
Bergä yörgän waqıtlarnı
Uylap sezgä talpınam...

Töşärmen isläreñä

Kerermen töşläreñä,
Töşärmen isläreñä,
Minem genä isem kitmäs
Sineñ ul xisläreñä.

Quşımta:
Telärseñ qoçaqlarğa
Yanarsıñ uçaqlarda.
Ämma sineñ yannarıñda
Min bulmam ul çaqlarda.

Tararsıñ çäçläreñne,
Kötärseñ däşkänemne.
Minem qulyawlığım belän
Sörterseñ yäşläreñne.

Kilerseñ yannarıma,
Basarsıñ allarıma,
Barıber tüzä almassıñ
Yörägeñ yanğanına.

Yaratıp qarasañ

Ägär bik-bik teläsäñ,
Küktän bäxet yañğırı
Qoyarğa bula ul,
Közge salqın tönneñ dä
Bik nazlı ikänen
Toyarğa bula ul,
Yaratıp qarasañ
Bar dönya da matur ul.

Can söygän yarnı ğına
Çın yöräktän söyep,
İş itep bula ul,
Sap-salqın boz eçendä
Qap-qaynar yöräkne
İşetep bula ul.

Bäxettän şaşqanda da
Tatlı küz yäşenä
Çılanıp bula ul,
Bolıtqa qaçıp qına
Yılmayğan qoyaşqa
Cılınıp bula ul.

Yazmış yomğaq sütä

Tañda qarşı alam
Aqsıl toman aşa,
Alsulanıp çıqqan qoyaşnı.
Küzlär belän sanıym
Ütkän ğömer yulın,
Şul yullarda qalğan yazmışnı.

Quşımta:
Ğömer ütä,ütä
Yazmış yomğaq sutä
Xoday yazğan yıllar yomğağın.
Cıyıp qına bulmıy,
Yäşlegeme qädär
Yıllar sütkän ğömer suqmağın.

Ciller iskän çaqta
Tarala aq toman,
Ällä şulmı yazmış cilläre?
Yazğı cillär aşa
Min dä qayçaq kötäm
Yäşlegemnän kilgän xäbärne.

Yäşlegemdä qalğan
Mizgellären tügel,
Yäşlegemneñ üzen sağınam.
Yäşlek belän közem,
Yıllar arasında
Qabat sarıla quyı aq toman.

Aq rozalar

Här yaz sayın
Küzlär yawın
Alıp çäçäk ata rozalar.

Quşımta:
Aq rozalar, aq rozalar,
Aq mäxäbbät, aq bäxetlär
Wäğdä itälär
Aq rozalar,
Aq roza-rozalar,
Söyü kötkän ğaşıyqlarnıñ
Canın ötälär.

Sezneñ cannan
Ğaşıyq cannar
Söyü cırın cırlap uzalar.

Şiñmäsennär,
Sulmasınnar,
Berqayçan da
Ap-aq rozalar.

Räxmätlemen Xodayıma

Üsterälär söyep, ulım-qızım diep,
Tidermiçä cillär-yañğırlar.
Äti-änilärne üzebez dä şulay
Yäşi alsaq ide gel zurlap.

Quşımta:
Räxmätlemen Xodayıma,
Räxmätle min här köngä.
Äti-äni diep däşü
Nasıyp bulsın härkemgä.

Tuar könnär dä, tuğan könnär dä
Söyeneçlär genä kitersen.
Onıqlarım diep söyep,
Ulım-qızım diep däşüläre
Şatlıq iñdersen.

Ğömerlär tiz ütä, ayırılu da citä,
Özgälänep qala bäğerlär.
Äti-änilärne isän çaqlarında
Yäşi alsaq ide qäderläp.

Quşımta:
Räxmätlemen Xodayıma,
Räxmätle min här köngä.
Äti-äni, äbi-babay
Kiräk bit ul härkemgä.

Ğömer ütä

Ütä ğömer digännäre,
Tañ ata da kiç bula.
Ütkännärne uylıy-uylıy
Qaywaqıt küñel tula.

Quşımta:
Yılasañ da, cırlasañ da
Ütkännär qabat qaytmıy.
Ğömer däryälarında
Sular kiregä aqmıy.

Dönya artınnan quabız
İrtäsen dä, kiçen dä.
Äylänäbez tien sıman

Tormış tägärmäçendä.
Bulğanına şöker itep,
Şatlanır waqıt tabıyq.
Qabatlanmaslıq könnärneñ
Qäderen belep qalıyq.

Sinsez ütte ğömerem

Qullarıma alıp aqqoş qawrıyların
Su buyların urap äylänäm.
Dönya moñğa çumğan,
Aña nilär bulğan?
Nigä sağış qalğan cäylärdän?

Äle ğömer ozın, qayçan da ber
Oçraşırbız diep yördem.
Äy, sızlıy la küñel,
Äy, ärni lä yöräk,
Sinsez ütkän ikän ğömerem.

Qullarıma alıp aqqoş qawrıyların
Tağın çumam moñsu uylarğa.
Kinät-kinät özelep,
Ber-ber artlı tezelep
Yafraqlar qoyıla yullarğa.

Teläk

Sin çiksezlek, zäñgär kügem...

Yoldızıñ bulsañ ikän...
Yörägeñneñ iñ türendä
Balqıp la torsañ ikän...

Quşımta:
Sin ofığım, alsu şäfaq...
Qoyaşıñ bulsañ ikän...
Mölderämä küzläreñä
Ser bulıp tulsañ ikän...

Sin diñgezem, oçsız däryä...
Dulqınıñ bulsañ ikän...
Küñeleñne köydererlek
Yalqınlap yansañ ikän...

Cäberlängän üksez canğa
Söyü köç birsä ikän,
Waqıt çiklären awdarıp
Bäxet nur sipsä ikän...

Bala äytkän awır süz

Çit-yat keşeneñ süzlären
Tıñlasam da, işetmim.
Bik awır süz äytsälär dä,
Ällä ni isem kitmi.

Quşımta:
Üz balamnıñ süzläre bit,
Ärnemä, yörägem, tüz.
Turı yöräkkä qadala
Bala äytkän awır süz.

İrkälektä üskän bala
Süz äytä uylamıyça.
Ana qäderen belmi ul
Üze äni bulmıyça.

Yañğırdan süngän uçaqtay
Qabat qabına almam.
Süzläreñne cide tügel,
Citmeş qat ülçä, balam.

İsän genä yör, qäderlem

Bezneñ tormış göle çäçäk ata
İkäw sipkäç şifa suların
Mine añlap, söyep yäşägängä
Yaqtı bulsın yörer yullarıñ...

Quşımta:
İsän-saw ğına bul sin, qäderlem,
Härwaqıt yöriseñ yullarda.
Färeştälär siña yuldaş bulsın
Alda qarşılıqlar torğanda.

Här irtäne başlıyq matur süzdän
Qaraşlardan añlap serlärne
Ber-bereñä nazlar büläk itep
Ütkärik lä yaña könnärne.

Sineñ kebek güzäl keşene min
Küpme ezläsäm dä tabalmam.
Añlıym sineñ çista xisläreñne
Yannarıñnan kitep yuğalmam.

Gölcamal

Şämdällärdä genä utlar yana, Gölcamal,
Citkän qızlar kinder cep erlilär.
Ence dä märcän qızlarnıñ qul bawı,
Awır can söygännärneñ bulmawı.

Nindi genä yegetkä barırbız, dip, Gölcamal,
Qolaqtan qolaqqa alar söylilär.
Ence dä märcän qızlarnıñ qul bawı,
Awır can söygännärneñ bulmawı.

Tuğan awılıma

Çıñlı suı cäyelep ağa,
Yazğı taşqınnar kilsä.
Taşqınnar kebek şawlaşıp,
Awılımda yäşlär üsä.

Tuğan awılım minem qarşımda,
Küñelem haman omtıla şunda.

Yıraqlardan qarap kiläm
Çıñlı basularına.
Şunda ğına tıñğı tabam
Küñelem yarsularına.

Tuğan awılım minem qarşımda,
Küñelem haman omtıla şunda.

Şuşı qırlar buylap minem
Yäşlek yullarım ütkän.
Şul yullardan yäşlek dustım
Yılmayıp çıqsa ikän!

Tuğan awılım minem qarşımda,
Küñelem haman omtıla şunda.

Oçraşırbız dideñ

Oçraşırbız, – dideñ... Oçraşmadıq...
Yuğaldıñ sin inde mäñgegä...
Allarıñda qar-buranlı yullar..
Ax adaştı yalğız can ğına.

Oçraşırbız, – dideñ... Oçraşmadıq...
Nigä genä canım cilkende?
Mine yuatırday töşter inde
Ürsälängän buran şikelle...

Töşläremä kerep irkälädeñ,
Yuqsınularıma quşılıp.
Sepertmäle qarlar öyerelä,
Säğät tağın küçmi başına...

Oçraşırbız, – dideñ... Oçraşmadıq...
Nigä genä canım cilkende?
Mine yuatırday töşter inde
Ürsälängän buran şikelle...

Qayt sin, balam

Yazğı sular urğıp aqqan çaqta,
Küñellärem sine yuqsına,
Yazlar yämle tügel sinnän başqa,
Qayt sin, balam, tizräk qaytsana.
Qayt, küz nurım, qayt tuğan yağıña,
Tuğaylarıñ sine sağına.

Öy türendä qoşlar oya qordı,
Sayrawların tıñlap yuanam.
Alar tizdän bala üstererlär,
Minem genä yortım tın haman.
Qayt sin, balam, qayt tuğan yağıña,
Tuğaylar da sine sağına.

Yaz qaytmadı, bälki, köz qaytır dip,
Sine kötep yäşim min haman.
Uzmasın la ğömerem sağış belän,
Qayt, küz nurım, tizräk qayt, balam,
Qayt sin, balam, qayt tuğan yağıña,
Ğäziz änkäñ sine sağına...

Canım

Nazım, canım, sine köttem, yar ittem, parlı qanatım.
Sine bu qädärle tik min yarattım.
Kem äytsä ber naxaq süz, ışanma – yalğan,
Mäxäbbät süzläre söyli qaraşım!

Sin bügennän üz qulıñ belän mine sal utlarğa,
Tik mine yaratıp tuqtama!
Sin teläsäñ – min oçarmın,
Sineñ öçen diñgezlärdän,
Däryälardan yul yasarmın.
Arabızğa kersälär tabarmın,
Bar özelgän ceplärne yalğarmın,
Bu cirne iñläp-buylap yul yasarmın.

Nazım, canım, sine köttem, yar ittem, ülep yarattım.
Böyek bu cihanda tik sin qanatım.
Kem äytsä ber naxaq süz, ışanma – yalğan,
Yaratu süzläre söyli qaraşım!

Sin bügennän üz qulıñ belän mine sal utlarğa,
Tik mine yaratıp tuqtama!
Sin teläsäñ – min oçarmın,
Sineñ öçen diñgezlärdän,
Däryälardan yul yasarmın.
Arabızğa kersälär tabarmın,
Bar özelgän ceplärne yalğarmın,
Bu cirne iñläp-buylap yul yasarmın.

Yaratqanım sin genä,
"Ocmax" bulır yäşär cirem -
Yannarıma kil genä.

Sin bügennän üz qulıñ belän mine sal utlarğa,
Tik mine yaratıp tuqtama!
Sin teläsäñ – min oçarmın,
Sineñ öçen diñgezlärdän,
Däryälardan yul yasarmın.
Arabızğa kersälär tabarmın,
Bar özelgän ceplärne yalğarmın,
Bu cirne iñläp-buylap yul yasarmın.

Soñğı dimä

Soñğı çäçäk, soñğı göllär dimä
Tik bu yılğa alar soñğısı.
Qışlar ütkäç, yaña yazlar kilä
Göllärneñ dä bulır yañası.

Quşımta:
Soñğı dimä, axırzaman tügel,
Işandırma äle canıñnı, canıñnı,
Soñğı dimä, qabul itmi küñel
Härnärsäneñ bula däwamı.

Soñğı cırım, soñğı köyem dimä,
Cır telendä cannar awazı.
Yöräk moñnarına qarşı kilmä,
Küpme keşe otıp alası.

Soñğı könem, ğömer soñı dimä,
Tik ber Xoday belä anısın.
Tañnar aşa yaña könnär kilä,
Ömetle it härber yañasın.

Sezdä qala yartı canıbız

Utlar sünär tizdän bu zallarda,
Alqışlar da tınar, cırlar da.
Cırlanaçaq yaña cırlarıbız
Çaqıra bezne yıraq yullarğa

Quşımta:
Bez kitäbez, moñlı cırlar bulıp
Atsın sezneñ härber tañığız
Kitsäk tä bez yıraq yıraqlarğa,
Sezdä qala yartı canıbız.

Utlar sünär, läkin yöräklärdä
Mäñge sünmäs kebek bu xislär.
Bezne cır qanatında tirbätkän
Qabatlanmas kebek bu kiçlär.

Küreşerbez äle tağın, duslar,
Birsen genä Xoday ğömerlär.
Küreşerbez sezneñ yöräklärgä
Moñnar belän ürep küperlär.