Törkiyadäge Konya ölkäsendä yaşäwçe seber tatarları (boxaralar) awılı şuşı könnärdä ikençe därcädäge domen belän üz saytın açtı. www.bogrudelik.com adresı belän awıl tarixınnan xikäyalär, awıldaşlar turında yazmalar urın algan. Moñarçı http://www.bogrudelik.xm.com/ adresında yaşägän sayt şulay itterep awılnıñ 100 ellıgı bäyrämennän soñ ruxlanıp yaña saytka küçkän. Gomumän Törkiyadäge tatar awılları arasında saytsızı kalmadı kebek inde.
Bögredälik
Bögredälik, Bögredälik
Minem tugan ilem sin!
Aşın aşap, suın eçep
Tuıp üskän ilem sin!
Bögredälik, Bögredälik
Küzem açkan ilem sin!
İnäm diep, atam diep
Cır cırlagan telem sin!
Bögredälik, Bögredälik
Kızlar söygän ilem sin!
Cırlar cırlap garmun tartıp,
Tuylar korgan ilem sin!
Bilgele bulgança, Tatarstannan ber törkem räsmi häm icadi delegatsiya Törkiyaneñ bu tatar awılında 100 ellıgın bäyräm itep kayttı.
Cihanbäyle rayonında urnaşkan älege avılga XX gasır başında Könbatış Seber, Omski yaklarınnan küçep kilgän tatarlar nigez salgan. Xäzerge wakıtta awılda 400läp xucalık bar. Cäy aylarında biregä Auropanıñ törle illärennän - Daniya, Germaniya, Niderlandtan 2 meñläp keşe kayta. Alar barısı da bu awılda tuıp üskän, çit illärgä isä eşkä yörilär. Yubileyda Tatarstannıñ Törkiyadäge väkile Radik Gıymatdinov, Tatarstan Mädäniyat ministrlıgınıñ Töbäkara häm millätara xezmättäşlek bülege başlıgı Räysä Safiullina citäkçelegendäge delegatsiya katnaştı. Alar arasında TR Fännär akademiyaseneñ Tarix institutı baş fänni xezmätkäre, Tatar entsiklopediyaseneñ "Sängat" bülege baş möxärrire, sängat belgeçe Güzäl Söylämanova da bar ide. Kontsertlarda Kazan artistları, Zäyneñ "Miras" ansamble çıgışlar yasadı.
Şulay uk awıldaşlar da kontsertka äzerlängän. Şunısın da äytik: bu awıl kiyave, kurayçı häm şagıyr, arçalı Fänis Zıyatov (Zıyalı) ta bu awıl yaşlärenä mädäni tärbiya birüdä zur eşlär başkara. Fänis Zıyatov Kazanda şigır kitabın çıgardı. Şulay uk bu awıl keşeläre arasınnan Törkiya televideniyasında bäygelärdä katnaşkan cırçılar da bar. Alar yanına bäyrämgä İstanbuldagı danlıklı "Tumata" törkeme solistkası Göltan Urallı kebek tatar muzıkası fanatkası da kilü zur söeneç bulgan. Awılga mäxäbbät cirle şagıyr Sibägatdin Orxannı ruxlandırgan.
24.07.2007
Amil NUR
Intertat
|
